Háítí – ceacht do gach duine againn

I mí Eanáir 2010, tharla trí chrith talún i gContae Dhún na nGall.
Creathanna beaga talún a bhí iontu, ach mar sin féin, bhí sceitimíní an domhain ar mo dheartháir agus é ag insint dom fúthu.
Caithfidh mé a admháil go raibh mé rud beag amhrasach faoin méid a dúirt sé, agus céard a dhéanann daoine nuair a bhíonn amhras orthu, na laethanta seo?
Téann siad ar an idirlíon agus déanann cuardach ar google. Nó déanann siad ‘googláil’, más fearr leat an téarma nuachumtha sin.
Ar scor ar bith, d’aimsigh mé scéal nuachta ar shuíomh gréasáin RTÉ láithreach, a dheimhnigh go raibh creathanna talún i nDún na nGall le déanaí.
Ní raibh iontu ach creathanna beaga, agus ní dhearnadh damáiste ar bith, ach mar sin féin, bhain sé geit asam a bheith ag léamh an scéil, go háirithe mar gheall ar an uafás ar fad a bhain le crith talún Háítí.
I rang Gaeilge, an tseachtain seo caite, bhíomar ag déanamh plé ar an bhliain 2012.
Creideann daoine áirithe go dtiocfaidh deireadh leis an domhan sa bhliain sin nó go dtarlóidh rud éigin ollmhór, cosúil leis an ‘Ollphléasc’.
Ar dtús, shíl mé go raibh sé iontach greannmhar agus b’ionadh liom go n-éistfeadh éinne leis an raiméis sin, ach de réir mar a rinneamar plé air, d’athraigh mo dhearcadh ina leith.
Seans go bhfuil fírinne éigin ag baint leis an chaint ar fad faoi théamh domhanda, agus ní féidir a shéanadh go bhfuil aimsir na hÉireann neamhghnách le tamall anuas.
Ar dtús, bhí tuilte uafásacha ar fud na tíre agus ansin tháinig an fuacht agus an sneachta agus an leac oighir.
Bhí easpa grin ar fáil agus bhí an tAire Iompair, Noel Dempsey, ar saoire i Málta, ag baint sult as an ghrian agus as an teas, le linn dó seo go léir a bheith ag tarlú.
Ar ndóigh, dá mbeadh infrastruchtúr níos fearr againn, agus dá mbeadh an trealamh ceart ag na comhairlí contae, ní bheadh cúrsaí chomh dona is a bhí siad, ach ní gá a thuilleadh a rá faoi sin.
Ansin, tharla an crith talún tubaisteach i Háítí, agus creathanna beaga i nDún na nGall.
Gach seans gur comhtharlúintí atá iontu go léir, ach uaireanta, is maith linn gach rud a chur le chéile agus teacht ar chonclúid nó ar réiteach éigin.
Sa chás seo, tá daoine i ndiaidh dul thar fóir agus a rá go mbeidh an saol mar is eol dúinn é, go mbeidh sé imithe i gceann dhá bhliain.
Nó an bhfuil an ceart acu?
Tá rud éigin faoin éiginnteacht sin a tharraingíonn ár n-aird, a dhúisíonn ónár mbrionglóidí muid agus a chuireann ag suí suas díreach sa chathaoir muid.
Smaoineamh scanrúil atá ann, ach smaoineamh a chuireann ár n-intinn agus ár samhlaíocht ag obair i mbealaí nach n-oibríonn siad de ghnáth.
Má bhíonn beagáinín teas agus gréine againn in Éirinn, an samhradh seo, is cinnte go mbeimid go léir ag ceapadh go bhfuil fírinne éigin ag baint leis na teoiricí aisteacha seo faoi 2012 nó, ar a laghad, faoin téamh domhanda agus na hathruithe fisiciúla atá ag teacht ar an domhan.

Scríofa ag ar 05.02.2010 Rannóg tuairim.

Tabhair Freagra

© Nuacht24