Foireann na hÉireann ag na cluichí Oilimpeacha

le Aaron Mac Fhionnlaoich

Bhí atmaisféar brónach le brath ag searmanas tionscnaimh na gCluichí Oilimpeacha an Gheimhridh i Vancouver ag deireadh na seachtaine seo caite. Thóg sé os cionn uair a chloig ar na aclaí filleadh isteach i Stad B.C. Place agus níor sheas an slua a bhí a láthair chun bualadh bos a thabhairt do na aclaí ach do dhá thír; an náisiún óstach, Cheanada, agus An tSeoirsia, tar éis bás tragóideach duine dá bhfoireann.
Fuair Nodar Kumaritashvili (21) bás ag deireadh na seachtaine i dtimpiste agus é ag traenáil don luge nuair a chuaigh sé ó smacht ar an gcúinne deireanach. D’imigh Kumaritashvili den chúrsa ar luas 143.4km/u. D’iompaíodar é in aerárthach othar go hospidéal Whistler áit a bhfógraíodh bás an aclaí cúpla uair a chloig roimh shearmanas oscailte na gCluichí.
Bhí ról mór ag bundúchasaigh Cheanada leis an searmanas agus chuir bundúchasaigh ó cheantar Vancouver agus gach réigiún de Cheanada fáilte roimh na haclaí ina dteangacha dúchasacha agus le ceol agus damhsa traidisiúnta.
Seisir atá ar fhoireann na hÉireann i mbliana. Tá Aoife Hoey agus Claire Bergin ar an bhfoireann bobshleamhnáin, an chéad fhoireann bhobshleamhnáin bhaininn Éireannach chun freastal ar na Cluichí Oilimpeacha. Leo ar fhoireann na hÉireann ná Pat Shannon a bheidh in iomaíocht sa chomórtas bholgshleamhnaithe, Kirsty McGarry agus Shane O’Connor sa slalóm alpach, agus PJ Barron sa rás sciáil trastíre.