Nuacht24 » nuacht

An mhí is marfaí acu riamh

eoghan nill — Fri, 30 Jul 2010 14:18:34 +0000

Bhí mí Iúil ar an mhí is measa ag arm Mheiriceá san Afganastáin riamh. Maraíodh 63 saighdiúir, an líon is mó saighdiúirí ó rinne Meiriceá ionradh ar an tír naoi mbliana ó shin. Go dtí seo bhí mí Mheithimh 2010 ar an bhliain is measa ag arm Mheiriceá san Afganastáin. Ar maidin inniu thug saighdiúirí Shasana agus saighdiúirí arm na hAfganastáine faoi oibríocht chun an Talaban a chur ar an chos chúl i gceantar Nad Ali, cliabhán de chuid an Talaban i gcúige Helmand.

Proinsias gan Ghaeilge

eoghan nill — Fri, 30 Jul 2010 08:01:27 +0000

Deir urlabhraí Gaeltachta Fhine Gael, Frank Feighean, nach bhfuil sé ar intinn aige éirí as a chúram in ainneoin go leor Gaeilgeoirí a bheith míshásta nach bhfuil aon Ghaeilge aige.

Dar leis agus é ag caint ar RTÉ ar maidin, dar leis nach bhfuil aon mhórfhadhb aige a chuid oibre a dhéanamh cionn is nach bhfuil Gaeilge aige.

Deir sé go bhfuil sé ag foghlaim na teanga anois agus go bhfuil Dinny Mc Ginley agus Enda Ó Cionnaith ag cuidiú le gnéithe eile den obair a bhíonn le déanamh aige.

Ach is beag a dhéanfaidh a chuid cainte chun baint den mhíshásamh atá coitianta i measc Gaeilgeoirí a mhothaíonn gur maslach an rud duine gan Ghaeilge a cheapadh mar Aire Gaeltachta, rud a rinneadh nuair a ceapadh Síle de Valera agus Michael Ring roimhe seo agus nuair a cheap Cathal Ó hEochaidh é fén ina Aire Gaeltachta!

Tochailt ag dul ar aghaidh ar trí láthair

eoghan nill — Thu, 29 Jul 2010 20:38:00 +0000

Táthar ag leanúint i dtrí chontae le tochailt do na daoine sin a d’iimigh as radharc le linn na dtrioblóidí ó thuaidh. Tá muinín as an nua ag roinnt gaolta leis na daoine a maraíodh i ndiaidh gur aimsíodh taisí i gContae Muineacháin Déardaoin.

Meastar gurb iad taisí Charles Armstrong atá i gceist ach beidh scrúduithe seachtaine de dhíth chun sin a chinntiú.

Fritheadh na taisí níos luaithe sa tseachtain ach níor fógraíodh a n-aimisiú go dtí inniu.

D’imigh Charles Armstrong as láthair nuair a fuadaíodh é i gCrois Mhic Lionainn in 1981. Níor ghlac an IRA riamh leis gurb iad a mharaigh é ach meastar gur Poblachtaigh a bhí freagrach as a mharú.

Bhí cuardach ag dul ar aghaidh le sé mhí san áit a fritheadh an corp, go háirithe ó fuarthas litir sé mhí ó shin ag cur eolas breise ar fáil faoin dúnmharú.

Tá na taisí anois á scrúdú i mBaile Átha Cliath.

Aitheantas do 4 Ghaelscoil eile ó thuaidh – raic

eoghan nill — Wed, 28 Jul 2010 21:24:22 +0000

Tá aontachtaithe ag cáineadh Caitríona Ruane as a bheith ag tabhairt a bharraíocht airgid do Ghaelscoileanna sa tuaisceart. Cháin idir an DUP agus an UUP cinneadh Caitríona Ruane chun aitheantas a thabhairt do ceithre Ghaelscoil sa tuaisceart inniu. Is iad na scoileanna atá i gceist ná Gaelscoil an tSeanchaí, ar Mhacaire F iolta; Gaelscoil na mBeann, Cill Caol; Gaelscoil Léim an Mhadaidh,agus Gaelscoil Choin Rí Uladh, ar an Bhaile Meánach. Deir Mervyn Storey ón DUP gur ionadh go bhfuil maoiniú ar fáil do Ghaelscoileanna nuair nach bhfuil maoiniú ar fáil d’earnalacha eile oideachais ó thuaidh. Agus deir Tom Elliott ón UUP gur ionadh leis go bhfuil méadú faoi chúig ar mhaoiniú scoileanna Gaeilge ó rinneadh Aire Oideachais de Caitríona Ruane.

Scaoileadh sa Spáinn – Éireannach marbh

eoghan nill — Wed, 28 Jul 2010 10:10:16 +0000

Deir an Roinn Gnóthaí Eachtracha go bhfuil siad ag cuidiú le gaolta an Éireannaigh a maraíodh in eachtra scaoilte in Benalmádena sa Spáinn go luath ar maidin inniu. Tharla an scaoileadh i Coco’s Bar in aice le Malaga. Bhí John O’Neill (40) i mbeár faoin a trí a chlog ar maidin nuair a tháinig fear isteach agus scaoil chun báis é. Tuigtear nach bhfuil aon cheangal ag drongadóirí leis an scaoileadh agus gur iaróg a tharla sa teach tábhairne níos luaithe san oíche a ba cionnsiocair leis an scaoileadh.

Aerfort Christy Ring?

eoghan nill — Wed, 28 Jul 2010 08:30:38 +0000

Tá Sinn Féin agus páirtithe eile i gContae Chorcaí in adharca a chéile – faoin ainm a ba cheart a thabhairt feasta ar Aerfort Chorcaí. Tá Sinn Féin ag iarraidh go ndéanfaí an t-aerfort a athbhaisteadh in ómós do Traolach Mac Suibhne, Ard Mhéara Chorcaí a fuair bás agus é ar stailc ocrais in 1920. Ach tá Fianna Fáil agus Fine Gael ag iarraidh go ndéanfaí an aerfort a ainmniú i gcuimhne ar dhuine ón nua stair, macasamháil Rory Gallagher nó Christy Ring.

Leonard faoi thionchar Yeats

eoghan nill — Wed, 28 Jul 2010 08:21:42 +0000

Tabharfaidh Leonard Cohen cuairt phríobháideach ar uaigh WB Yeats agus é i Sligeach an deireadh seachtaine seo. Dé Sathairn is Dé Domhnaigh beidh an cheoltóir Cheanadach ag seinm os comhair 20,000 duine ag Lisadell House agus tá gach ticéad do na cheolchoirmeacha díolta i bhfad ó shin. Ach más fíorú na físe do go leor den lucht éisteachta Cohen a fheiceáil i mbun ceolchoirme is fíorú na físe é don cheoltóir fanacht sa teach mar a stop W B Yeats agus é ar chuairt ar an Countess Markievicz. Bhí Yeats ar dhuine de na filí is mó a chuaigh i bhfeidhm ar Leonard Cohen , ceoltóir a bhfuil iomrá mór air as a fhilíocht in amhráin agus díreach mar fhilíocht ann féin. Dé Domhnaigh tabharfaidh an tUasal Cohen cuairt ar uaigh WB Yeats. Agus cá fios nach mbeidh amhrán nó dán mar thoradh ar an chuairt sin.

Seoladh sa Cheathrú Póilí – Scoil Samhraidh Mhic Reachtainn

eoghan nill — Tue, 27 Jul 2010 14:54:45 +0000

Tá Scoil Samhraidh Mhic Reachtainn ar siúil i mBéal Feirste an tseachtain seo. Beidh féile na scann án ar siúil anocht ag an Áras 174 ar Bhóthar Aontroma. Taispeánfar Fleadh le Louis Marcus (1967) Filleann Feall (Cillian Murphy, Don Wycherly, Aine Ní Mhuirí) Cáca Mílis a shaothraigh moladh mór nuair a taispeánadh é den chéad uair ar TG4 in 2001 agus Tacsaí Dubh le Léiriúacháin Tobar, scéal na dtacsaithe dubha i mBéal Feirste Thiar ó am a mbunú in 1971. Beidh imeachtaí na Féile ar siúil feadh na seachtaine ar fad. Tuilleadh eolais ag http://www.ccmr156.com/

Dé Sathairn déanfar an leabhar ‘Scéaltaí Ban ó thuaisceart na hÉireann’ a sheoladh sa Chultúrlann i mBéal Feirste. Is í an iriseoir Iodálacha, Silvia Calamati a scríobh an leabhar agus Seán Mac Aindreasa a rinne a aistriú. Beidh an leabhar á seoladh sa Cheathrú Póilí ar 1.00 Dé Sathairn 31 Iuil.

‘Ghlacfainn le Céad Aire Poblachtach’ – Paisley

eoghan nill — Tue, 27 Jul 2010 13:33:39 +0000

Deir Ian Paisley go nglacfadh sé le Sinn Féiní a bheith ina Chéad Aire sa tuaisceart. Thug sé sin le fios in agallamh leis an nuachtán an News Letter. Chuir sé in iúl go mbeadh air glacadh le toil an phobail agus i dtagairt a síltear a bheith ina cáineadh ar Peter Robinson agus ceannairí reatha an DUP chuimhnigh sé nár tharla Céad Aire de chuid Shinn Féin ‘ on my watch.’ Tá dearcadh Ian Paisley ag teacht salach ar go leor polaiteoirí aontachtacha a chuir in iúl go mbeadh sé ‘doghlactha’ dá mbeadh Sinn Féineach ina Chéad Aire.

Níos mó ná 500m san Aontas Eorpach anois

eoghan nill — Tue, 27 Jul 2010 11:39:01 +0000

Tá daonra an Aontais Eorpaigh i ndiaidh dul thart 500 milliún den chéad uair riamh. Bhí 499.7 milliún duine ina gcónaí san Aontas ar 1 Eanáir 2009 ach faoi 1 Eanáir 2010 bhí 501.1 milliún i gceist. Tháinig cúig mhilliún naíonán ar an tsaol san Aontas Eorpach in 2009 agus bhí an ráta bréithe is airde ag Éirinn, an Bhreatain agus an Fhrainc agus an ráta is ísle sa Ghearmáin agus san Ostair. Ach bíodh is go bhfuil daonra an Aontais ar méadú is amhlaidh go bhfuil sé i bhfad ar chúl iomaitheoirí ar nós na Síne. Tá breis agus 1.2 billiún duine ag an tSín agus iad ag dréim leis go mbainfidh siad 1.4 billiún duine amach faoi 2015. Bhí billliún duine in India an t-am deireannach a rinneadh daonáireamh ansin (2001) agus de réir dealraimh tá stró mór othug daonáireamh nua a chur le chéile i láthair na huaire.